សៀមរាប៖ស្ពានឈើមួយដែលស្ថិតក្នុងភូមិស្រែសមុទ្រឃុំស្រែណូយស្រុកវ៉ារិនខេត្តសៀមរាបដែលមានសភាពទ្រុឌទ្រោមត្រូវរដ្ឋបាលស្រុកវ៉ារិនរួមសហការជាមួយសហភាពសហព័ន្ធយុវជនកម្ពុជាស្រុកវ៉ារិនបានជួសជុលរួចរាល់ជាស្ថាពរ នៅថ្ងៃទី២១ខែកក្កដា ឆ្នាំ២០២០នេះ។
លោកធិននីវិធូរអភិបាលស្រុកវ៉ារិនបាននិយាយថាស្ពានឈើមួយកន្លែងដែលមានប្រវែង៣៥ម៉ែត្រគុណនឹង៤ម៉ែត្រដែលមានសភាពចាស់ទ្រុឌទ្រោមនិងបាក់ទ្រេតសសរស្ពានមិនអាចធ្វើដំណើបានរយៈកាលកន្លងមក។
ឥឡូវត្រូវបានរដ្ឋបាលស្រុកវ៉ារិននិងសហភាពសហព័ន្ធយុវជនកម្ពុជាស្រុកវ៉ារិនសហការជាមួយកម្លាំងសមត្ថកិច្ចស្រុកឃុំរដ្ឋបាលឃុំស្រែណូយបានសាមគ្គីគ្នាចូលរួមជួសជុលស្ពានស្រែសមុទ្រនេះ រួចរាល់ជាស្ថាពរ។
លោកបានឱ្យដឹងទៀតថាស្ពានឈើនេះកន្លងមកគឺនៅរដូវប្រាំងទឹកស្ទឹងស្រកអស់ប្រជាពលរដ្ឋគាត់ធ្វើដំណើរចុះវាងក្នុងស្ទឹង។ប៉ុន្តែដល់រដូវវស្សាទឹកស្ទឹងចាប់ផ្ដើមឡើងបន្តិចម្តងៗធ្វើពួកគាត់ពិបាកធ្វើដំណើរ។ការជូសជុលស្ពាននេះបានចំណាយសរុបជាថវិកាចំនួន៩.០២៥.៦០០រៀលទៅលើការទិញឈើសម្ភារនិងអាហារដែលថវិកាទាំងនេះបានមកពីការចូលរួមពីអាជីករ និង សប្បុរសជនក្នុងស្រុក ។
លោកអភិបាលស្រុកវ៉ារិនបានឱ្យដឹងទៀតថានេះជាសមិទ្ធផលថ្មីមួយបន្ថែមទៀតដែលបានមកពីការចូលរួមសហការនិងសាមគ្គីគ្នាសម្រេចបានលទ្ធផលគួរជាទីមោទនៈ។ដូច្នេះតាមរយៈនេះសូមសំណូមពរដល់ប្រជាពលរដ្ឋទូទៅសូមជួយថែរក្សាស្ពាននេះដើម្បីជាប្រយោជន៍រួមក្នុងការបម្រើជីវភាពរស់នៅប្រចាំថ្ងៃរបស់ខ្លួន ៕