ព័ត៌មានជាតិ

ឧត្តមសេនីយ៍ឯក ស ថេត អញ្ជើញត្រួតពិនិត្យកម្លាំងអន្តរាគមន៍ និងចែកឈុតសម្លៀកបំពាក់ ដល់កម្លាំងចំនួន៦៥២នាក់

ភ្នំពេញ ៖ នៅព្រឹកថ្ងៃពុធ ទី២២ ខែកក្កដា ឆ្នាំ២០២០ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញត្រួតពិនិត្យកម្លាំងអន្តរាគមន៍មកពីបណ្តាអធិការខណ្ឌទាំង១៤ ចំនួន៤២០នាក់ កម្លាំងអន្តរាគមន៍នៃការិយាល័យចរាចរណ៍ផ្លូវគោកចំនួន៥០នាក់ និងកម្លាំងអន្តរាគមន៍ចំនួន១៥០នាក់ ដោយមានការចូលរួមពីលោក លោកស្រីស្នងការរង លោកអធិការនគរបាលខណ្ឌទាំង១៤ សរុបកម្លាំងទាំងអស់ចំនួន ៦៥២នាក់។

ការជួបជុំនេះដើម្បីផ្តល់ជូន អាវពន្លឺចំនួន ១,០០០ អាវ ភ្លើងបំភ្លឺបំពាក់លើស្មាចំនួន ៥០០ ដែលជាអំណោយឧបត្ថម្ភរបស់មិត្តចិន និងឈុតសម្លៀកបំពាក់អន្តរាគមន៍ចំនួន ៤៧០ឈុត ដើម្បីចែកជូនក្រុមអន្តរាគមន៍ក្នុងមួយខណ្ឌទទួលបានចំនួន ៣០ឈុតសម្រាប់៣០នាក់។

ក្នុងឱកាសនោះដែរឯកឧត្តមស្នងការមានមតិណែនាំល្អៗជាច្រើនដល់កម្លាំងទាំងអស់ដូចជា ៖ ១. ក្នុងនាមជាកងកម្លាំងត្រូវតែគោរពវិន័យ មានសីលធម៌ មានអាកប្បកិរិយា និងប្រើប្រាស់សំដីសមរម្យជាមួយប្រជាពលរដ្ឋ។ ២. ត្រូវចូលរួមគោរពច្បាប់ចរាចរណ៍ឲ្យបានគ្រប់ៗគ្នា ក្នុងនាមជាមន្ត្រីអនុវត្តច្បាប់ ដើម្បីជាគំរូល្អសម្រាប់ប្រជាពលរដ្ឋ។ ៣. តាមបណ្តាខណ្ឌទាំងអស់ត្រូវតែបន្តតាមដាន និងចុះត្រួតពិនិត្យឲ្យបានជាប្រចាំ តាមបណ្តាក្លឹបកំសាន្ត ខារ៉ាអូខេ ទាំងអស់ត្រូវតែកែសម្រួលទៅជាភោជនីយ៍ដ្ឋាន ដោយគោរពតាមការណែនាំរបស់ក្រសួងសុខាភិបាល និងសេចក្តីប្រកាសណែនាំរបស់សាលារាជធានីភ្នំពេញ ។ ៤. កងកម្លាំងទាំងអស់ត្រូវចូលរួមគោរពតាមការណែនាំរបស់ក្រសួងសុខាភិបាល ដើម្បីបង្ការ និងទប់ស្កាត់ការឆ្លងរាលដាលវីរុសកូវីដ១៩ ដោយពាក់ម៉ាស់ជាប្រចាំ និងលាងដៃជាមួយសាប៊ូ ឬទឹកអាល់ឲ្យបានញឹកញាប់ ។

បន្ថែមលើនេះ ឯកឧត្តមស្នងការបានណែនាំដល់លោក លោកស្រីស្នងការរង អធិការខណ្ឌទាំង១៤ ត្រូវតែត្រួតពិនិត្យ និងគ្រប់គ្រងកម្លាំងអន្តរាគមន៍ឲ្យបានល្អ ដោយមានការហ្វឹកហាត់ជាប្រចាំ មានការប្រជុំជួរត្រួតពិនិត្យការស្លៀកពាក់ និងសម្ភារៈប្រើប្រាស់ផ្សេងៗទៀត ។ ម្យ៉ាងវិញទៀតក្នុងនាមជាកម្លាំងអន្តរាគមន៍ត្រូវតែប្រចាំការ ២៤ម៉លើ២៤ម៉ ចេញល្បាតជាប្រចាំ ដើម្បីធានាការពារសន្តិសុខសុវត្តិភាពជូនប្រជាពលរដ្ឋ ជាពិសេសការពារថ្នាក់ដឹកនាំ គណៈប្រតិភូជាតិ និងអន្តរជាតិ៕

cbn

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *