អន្តរជាតិ៖យោងតាមតួលេខស្តីពីចំនួនអ្នកឆ្លងនិងស្លាប់ដោយសារវីរុសកូវីដ១៩ចេញពីគេទំព័រអន្តរជាតិ Worldometerគិតត្រឹមម៉ោង៦និង០០នាទីព្រឹកថ្ងៃទី៩ខែឧសភាឆ្នាំ២០២០នេះបានចុះផ្សាយថាចំនួនឆ្លងជំងឺ កូវីដ១៩នៅទូទាំងពិភពលោក បានកើនឡើងដល់ ៤.០០៧.៨១៩ លានករណីហើយ ។
ក្នុងនោះមនុស្សសរុប ២៧៥.៧៨១នាក់ស្លាប់និងជាង១.៣៧៦លាននាក់បានជាសះស្បើយឡើងវិញ។
សូមបញ្ជាក់ផងដែរថាក្នុងចំណោមអ្នកឆ្លងសរុបទាំងជាង៤លាននាក់នោះគេឃើញមានប្រទេសអាមេរិកមានអត្រាអ្នកឆ្លងរាលដាលខ្លាំងជាងគេ ដែលមានសរុបចំនួន ១.៣២០.០៤៤ករណី។
គួរបញ្ជាក់ផងដែរថា ជំងឺកូវីដ១៩ដែលត្រូវបានអង្គការសុខភាពពិភពលោក WHO ប្រកាសចាត់ទុកជា «ជំងឺរាតត្បាតជាសកល»បានវាយលុកចូលដល់ប្រទេសនិងដែនដីសរុបចំនួន២១២ហើយនៅទូទាំងសកលលោក។វាបានរីកសាយភាយពាសពេញទ្វីបទាំងអស់លើភពផែនដីលើកលែងតែទ្វីបទឹកកកអង់តាក់ទិកមួយប៉ុណ្ណោះ។
ដោយឡែក ក្នុងកិច្ចការពារ និងទប់ស្កាត់មេដឹកនាំពិភពលោកបានអំពាវនាវឱ្យមានកិច្ចសហប្រតិបត្តិការ មិនមែនការប្រកួតប្រជែងឡើយក្នុងការស្រាវជ្រាវផលិតវ៉ាក់សាំងប្រឆាំងកូវីដ១៩ខណៈពួកគេបានសន្យាថា នឹងបរិច្ចាគប្រាក់ ៧,៥ពាន់លានអឺរ៉ូ (៨.១ពាន់លានដុល្លារ)។ នេះបើតាមការចេញផ្សាយដោយ សារព័ត៌មាន CNA នៅរសៀលថ្ងៃអង្គារ ទី៥ ខែឧសភា ឆ្នាំ២០២០។
ការសន្យាខាងលើធ្វើឡើងនៅក្នុងវេទិការៃអង្គាសប្រាក់តាមវីដេអូខុនហ្វេរិនរៀបចំឡើងដោយមេដឹកនាំអឺរ៉ុប រួមជាមួយជប៉ុន និងកាណាដា។ប្រធានគណៈកម្មការអឺរ៉ុប លោកស្រី យូស៊ូឡា វ៉ុន ដឺ ឡេយេន (Ursula von der Leyen) បានបញ្ជាក់ថា វ៉ាក់សាំងគឺជាមធ្យោបាយដ៏ល្អបំផុត ដែលអាចកម្ចាត់ កូវីដ១៩។
ប្រមុខអង្គការសុខភាពពិភពលោក លោក ថេដ្រូស អាដាណម ហ្គេប្រេយែសឹស (Tedros Adhanom Ghebreyesus) ក៏បានសម្តែងការសាទរ ចំពោះការរៃអង្គាសនេះប្រាក់នេះផងដែរ ព្រោះជាទង្វើបង្ហាញពីសាមគ្គីភាពជាសកល។
គួរជម្រាបថា បើតាមលោកស្រី Ursula von der Leyen ទឹកប្រាក់ ៧,៥ពាន់លានអឺរ៉ូ មាន៤ពាន់លានអឺរ៉ូ នឹងត្រូវបានប្រើប្រាស់ក្នុងការអភិវឌ្ឍវ៉ាក់សាំង,២ពាន់លានអឺរ៉ូផ្ដោតលើការស្រាវជ្រាវសម្រាប់ការព្យាបាល និង១,៥ពាន់លានអឺរ៉ូ សម្រាប់ការធ្វើតេស្ដ៕
