ភ្នំពេញ៖សមត្ថកិច្ចកងរាជអាវុធហត្ថរាជធានីភ្នំពេញកាលពីរសៀលថ្ងៃទី១១ខែឧសភាឆ្នាំ២០២០បានបញ្ជូនជនសង្ស័យម្នាក់ទៅតុលាការពាក់ព័ន្ធករណីរំលោភលើទំនុកចិត្ត(កិបកេងប្រាក់ក្រុមហ៊ុន)កាលពីឆ្នាំ២០១៩។ក្រោយពីឃាត់ខ្លួនកាលពីថ្ងៃទី៩ខែឧសភាឆ្នាំ២០២០កន្លងទៅ។
ជនសង្ស័យឈ្មោះ ហ៊ី បញ្ញា ហៅ តុប អាយុ៣៣ឆ្នាំ មុខរបរ បុគ្គលិកក្រុមហ៊ុន ហ្វាសអ៊ិនវេសមិន ត្រេឌីងមានស្រុកកំណើតខេត្តកំពង់ចាមទីលំនៅបច្ចុប្បន្នផ្ទះលេខ១៩៣ផ្លូវ៣១BTភូមិសន្សំកុសល២សង្កាត់បឹងទំពុនខណ្ឌមានជ័យ។
ការឃាត់ខ្លួនជនសង្ស័យនេះតបតាមពាក្យបណ្តឹងរបស់ឈ្មោះលឹមសំអឿនអាយុ៣៧ឆ្នាំជាមេធាវីតំណាងឱ្យក្រុមហ៊ុនហ្វាសអ៊ិនវេសមិនត្រេឌីងមានទីលំនៅ អាគារ២២ ផ្លូវ៥៩០ សង្កាត់ផ្សារដើមថ្កូវ ខណ្ឌចំការមន។
តាមចម្លើយសារភាពរបស់ជនសង្ស័យរូបនេះបានឱ្យដឹងថាកាលពីអំឡុងឆ្នាំ២០១៨ខ្លួនបានចូលបម្រើការងារក្នុងក្រុមហ៊ុនវ៉េនណូវ៉ាស្ថិតក្នុងសង្កាត់ផ្សារដើមថ្កូវខណ្ឌចំការមនដោយមានតួនាទីជាបុគ្គលិកផ្នែកទីផ្សារ(លក់ប្រេងម៉ាស៊ីន)។នៅអំឡុងឆ្នាំ២០១៩ពេលប្រមូលប្រាក់ពីអតិថិជនបានខ្លួនពុំបានយកប្រាក់ទៅទូទាត់ជូនក្រុមហ៊ុនទេ។
គឺយកប្រាក់នោះទៅចាយវាយផ្ទាល់ខ្លួនសរុបចំនួន១៣.០០០ដុល្លារអាមេរិក។ខាងក្រុមហ៊ុនបានហៅខ្លួនមកសម្របសម្រួលដោយរូបខ្លួនសន្យាថានឹងយកប្រាក់មកទូទាត់សងក្រុមហ៊ុនវិញ។ប៉ុន្តែដោយគ្មានការជឿទុកចិត្តទើបខាងក្រុមហ៊ុនបាននាំរូបខ្លួនប្រគល់ជូនសមត្ថកិច្ចអាវុធហត្ថខណ្ឌចំការមនតែម្តង។
បច្ចុប្បន្នជនសង្ស័យនេះត្រូវសមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថរាជធានីភ្នំពេញកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ៕