ភ្នំពេញ៖អាជ្ញាធររាជធានីភ្នំពេញបានប្រើគ្រឿងចក្រជាច្រើនគ្រឿងដើម្បីកាយសំរាមភក់ដើមស្មៅត្រែងនិងកំប្លោកដែលបានកកកុញនៅទ្វារទឹកស្ទឹងជ្រៅក្រុងតាខ្មៅខេត្តកណ្តាល។ការធ្វើសកម្មភាពកាយបើកផ្លូវទឹកបែបនេះរហូតដល់ខេត្តកណ្តាលគឺក្នុងគោលបំណងដើម្បីរំដោះទឹកចេញពីខណ្ឌជាច្រើននៅរាជធានីភ្នំពេញមិនថាកណ្តាលនិងជាយក្រុងនៃរាជធានីភ្នំពេញនោះទេ។
លោកសាំពិសិដ្ឋប្រធានមន្ទីរសាធារណការនិងដឹកជញ្ជូនរាជធានីភ្នំពេញបានបញ្ជាក់ឱ្យដឹងនៅព្រឹកថ្ងៃទី២៥ មិថុនានេះថា៖ តាមការណែនាំពីលោកឃួងស្រេងអភិបាលរាជធានីភ្នំពេញ។មន្ទីរសាធារណការ និងដឹកជញ្ជូនរាជធានីភ្នំពេញបានកាយសំរាមភក់ដើមស្មៅត្រែងកំប្លោកនៅទ្វារទឹកស្ទឹងជ្រៅក្រុងតាខ្មៅ ខេត្តកណ្តាល ដើម្បីរំដោះទឹកចេញពីខណ្ឌជាច្រើននៅរាជធានីភ្នំពេញ ។
លោកប្រធានមន្ទីរសាធារណការនិងដឹកជញ្ជូនរាជធានីភ្នំពេញបានបន្តថា៖ស្ទឹងជ្រៅមានទំហំពី២០ម៉ែត្រទៅ៣០ម៉ែត្រហើយស្ទឹងនេះជាផ្លូវបង្ហូរទឹកយ៉ាងសំខាន់ពីប៉ែកខាងត្បូងមហាវិថីសហព័ន្ឋរុស្ស៊ីនិងប៉ែកខាងត្បូងផ្លូវជាតិលេខ៤។
ដែលទទួលទឹកពីប្រឡាយទួលពង្រប្រឡាយបឹងហាប្រឡាយភូមិម័លប្រឡាយបឹងទំពុនប្រឡាយបឹងត្របែកនិងបឹងជើងឯករួចបង្ហូរទឹកឆ្ពោះទៅទន្លេបាសាក់ដែលអាចរំដោះទឹកចេញពីខណ្ឌចំនួន៣នៅជាយក្រុងនិង៥ខណ្ឌកណ្តាលក្រុង។
ក្នុងនោះរួមមាន៖ខណ្ឌដូនពេញ ,ចំការមន ,បឹងកេងកង ,៧មករា ,ទួលគោក( កណ្តាលក្រុង) មានជ័យ,ដង្កោនិងខណ្ឌពោធិសែនជ័យ(ជាយក្រុង)។ដោយមើលឃើញពីសារៈសំខាន់នេះទើបលោកឃួងស្រេងបានណែនាំឱ្យមន្ទីរសាធារណការនិងដឹកជញ្ជូនរាជធានីភ្នំពេញធ្វើសកម្មភាពកាយសំរាមភក់ដើមស្មៅត្រែងកំប្លោកនៅទ្វារទឹកស្ទឹងជ្រៅក្រុងតាខ្មៅខេត្តកណ្តាលនេះសំដៅធ្វើយ៉ាងណាអាចរំដោះទឹកបាននៅរដូវវស្សានេះ៕