កណ្តាល៖មន្ត្រីកងរាជអាវុធហត្ថរាជធានីពេញម្នាក់និងម្នាក់ទៀតជាមន្ត្រីយោធាកងកិត្តិយសត្រែទ័ព បានប្រើអំពើហិង្សាដាក់គ្នារហូតបណ្តាលឱ្យបែកក្បាលហូរឈាមស្រោចខ្លួន។ករណីនេះបានកើតឡើងនៅចំណុចភូមិស្វាយជ្រំ ឃុំស្វាយជ្រំស្រុកខ្សាច់កណ្តាល ខេត្តកណ្ដាលកាលពីយប់ថ្ងៃទី១០ ខែកក្កដា ឆ្នាំ២០២០។
លោកវរសេនីយ៍ឯកម៉ែនសុខឃឿនអធិការនគរបាលស្រុកខ្សាច់កណ្តាលបានឱ្យដឹងថាជនរងគ្រោះឈ្មោះលាងសុធីភេទប្រុសអាយុ២៦ឆ្នាំជាយោធាកងកិត្តិយសត្រែទ័ពនៅភូមិស្វាយជ្រំឃុំស្វាយជ្រំស្រុកខ្សាច់កណ្តាលខេត្តកណ្ដាលរងរបួសបែកក្បាលហូរឈាម។
រីឯជនសង្ស័យឈ្មោះជាសង្ហាភេទប្រុសអាយុ៣១ឆ្នាំជាអាវុធហត្ថនៅអង្គភាពកងរាជអាវុហត្ថរាជធានីពេញនៅភូមិស្នាពីមុខឃុំព្រែកខ្ពបស្រុកឯកភ្នំខេត្តបាត់ដំបង។ជនបង្កត្រូវសមត្ថកិច្ចឃាត់ខ្លួនដោយរួមមានវត្ថុតាងមានអាវុធខ្លីម៉ាកK54ចំនួន០១ដើមលេខ55006467,បង់១,គ្រាប់ចំនួន៨គ្រាប់។
លោកអធិការបានបន្តថាកាលពីយប់ថ្ងៃទី១០ ខែកក្កដា ឆ្នាំ២០២ជនសង្ស័យ បានជិះម៉ូតូឌុបប្រពន្ធ និងប្អូនស្រីចេញពីកម្មវិធីឡើងគេហដ្ឋានគេនៅបុរីចតុមុខត្រឡប់ទៅភ្នំពេញវិញ។ពេលជិះមកដល់ផ្លូវកៅស៊ូក៏ជួបជនរងគ្រោះកំពុងជិះម៉ូតូស្របទិសគ្នាហើយមានទំនាស់រឿងភ្លើងម៉ូតូចាំងភ្នែក។បន្ទាប់មកជនសង្ស័យបានវាយប្រតាយប្រតប់ជាមួយជនរងគ្រោះ។
ពេលនោះជនសង្ស័យបានដកអាវុធខ្លីពីចង្កេះមកវាយជនរងគ្រោះត្រូវត្រង់ក្បាលបណ្ដាលឱ្យបែកហូរឈាម។ភ្លាមៗនោះកម្លាំងប៉ុស្តិ៍ស្វាយជ្រុំនិងកម្លាំងផ្នែកយុត្តិធម៌ស្រុកបានចុះអន្តរាគមន៍ឃាត់ខ្លួនជនសង្ស័យ រួមទាំងវត្ថុតាង បញ្ជូនមកអធិការដ្ឋាននគរបាលស្រុក បន្តអនុវត្តតាមនីតិវិធី៕