ភ្នំពេញ៖លោកឃួងស្រេងអភិបាលរាជធានីភ្នំពេញបានបញ្ជាក់ថា៖ប្រឡាយជាប្រព័ន្ធបង្ហូរទឹកមានសារៈប្រយោជន៍យ៉ាងខ្លាំងសម្រាប់ប្រជាពលរដ្ឋទូទៅដែលរស់នៅជនបទប្រកបមុខរបរធ្វើស្រែចម្ការ។សម្រាប់ប្រជាពលរដ្ឋនៅក្នុងរាជធានីភ្នំពេញវិញប្រឡាយជាប្រព័ន្ធបង្ហូរទឹកក៏មានសារៈសំខាន់ខ្លាំងណាស់ដែរដោយវាអាចរំដោះទឹកលិចលង់លំនៅស្ថាន។
ការបញ្ជាក់បែបនេះរបស់លោកឃួងស្រេងអភិបាលរាជធានីភ្នំពេញបានធ្វើឡើងកាលពីថ្ងៃទី៨ខែកក្កដាឆ្នាំ២០២០ខណៈដែរលោកបានដឹកនាំមន្ត្រីជំនាញអាជ្ញាធរដែនដីចុះពិនិត្យមើលស្ថានីយបូមទឹកលូប្រាំនិងប្រឡាយបង្ហូរទឹកលូប្រាំស្ថិតក្នុងសង្កាត់ស្ទឹងមានជ័យ៣ខណ្ឌមានជ័យនិងប្រឡាយនានាក្នុងខណ្ឌដង្កោ។
លោកបញ្ជាក់ផងដែរថា៖ជាជំហររបស់រដ្ឋបាលរាជធានីភ្នំពេញយើងនឹងបង្កើតឲ្យមានក្រុមការងារមួយដែលមានការចូលរួមពីការិយាល័យសូរិយោដីខណ្ឌមន្ទីរសាធារណការនិងដឹកជញ្ជូនរាជធានីភ្នំពេញដើម្បីចុះបាញ់ថ្នាំកំណត់ទីតាំងឱ្យបានច្បាស់នឹងធ្វើការណែនាំប្រជាពលរដ្ឋដែលរំលោភប្រឡាយខាងលើអោយរុះរើចេញ។
បើតាមការបញ្ជាក់ទីអាជ្ញាធរមូលដ្ឋានថា៖ប្រឡាយលូប្រាំនេះមានទទឹង៥០ម៉ែត្រដោយទុកផ្លូវសងខាង ហើយត្រូវបានប្រជាពលរដ្ឋរំលោភយកចំនួនជាង១០០គ្រួសារដោយក្នុងនោះនៅភូមិឬស្សី១សង្កាត់ស្ទឹងមានជ័យ៣ចំនួន៣៥គ្រួសារនិងភូមិឬស្សី២ចំនួន៧៦គ្រួសារ។ពួកគាត់ទាំងនេះបានសង់លំនៅស្ថានរំលោភនៅលើតួប្រឡាយតែម្ដង។
គួរបញ្ជាក់ថា៖ស្ថានីយ៍បូមទឹកលូ៥មានទីតាំងស្ថិតនៅចំណុចមុំបីចំណុចប្រសព្វ៣ខណ្ឌគឺខណ្ឌមានជ័យខណ្ឌពោធិសែនជ័យនិងខណ្ឌដង្កោ។ប្រឡាយនេះមានតួនាទីយ៉ាងសំខាន់ក្នុងការរំដោះទឹកជំនន់ទឹកភ្លៀងចេញពីតំបន់ជាច្រើននៅក្នុងខណ្ឌទាំង៣នេះតែម្តង។
ក្នុងនោះដែរលោកដួងចាន់សារ៉ាត់ប្រធានអង្គភាពលូទឹកបូមទឹកមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា៖ស្ថានីយ៍បូមទឹកលូ៥នេះគឺជាទីតាំងយុទ្ធសាស្ត្រមួយក្នុងការបូមទឹកចេញពីតំបន់ខាងកើតព្រលានយន្តហោះតំបន់ចោមចៅតំបន់ត្រពាំងថ្លឹងភូមិគោកបញ្ជាន់តំបន់ផ្សារស៊ិនជូរីផ្លាហ្សាតំបន់ថ្មគោលផ្លូវ២០០៤និងមួយផ្នែកទៀតពីសង្កាត់ទឹកថ្លាខាងត្បូងមហាវិថីសហព័ន្ធរុស្ស៊ីដែលមានទំហំផ្ទៃរងទឹកភ្លៀងរហូតដល់១០២៨ហិកតា។
លោកបន្តថា៖ស្ថានីយ៍បូមទឹកលូ៥សាងសង់ឡើងជាអគារថ្មីមានបណ្តោយ១៨,៩ម៉ែត្រទទឹង១០,៩ម៉ែត្រ បំពាក់បំពង់ បូមទឹក៤គ្រឿង ក្នុងនោះបំពង់មុខកាត់៨តឹក២គ្រឿងនិងបំពង់មុខកាត់១ម៉ែត្រចំនួន២គ្រឿង។ដែលអាចមានសមត្ថិភាពបូមទឹកបាន៥ម៉ែត្រគុបក្នុងមួយវិនាទីនិងស្មើនិង២៨.៨០០ម៉ែត្រគុបក្នុង១ម៉ោង។ប្រឡាយនេះនាំទឹកហូរទៅប្រឡាយភូមិម័រ បន្តទៅជើងឯក និងបន្តទៅស្ទឹងជ្រៅ ខេត្តកណ្តាលទើបហូរចូលទន្លេបាសាក់៕