វ៉ាស៊ីនតោន ៖ សេតវិមានកាលពីថ្ងៃអាទិត្យនេះបានប្រកាសពីការរឹតត្បិតការធ្វើដំណើរជាមួយប្រទេសប្រេស៊ីលបន្ទាប់ពីប្រទេសនេះបានក្លាយជាប្រទេសដែលមានចំនួនឆ្លងកូវិ១៩ច្រើនបំផុតលំដាប់ទី២នៅលើពិភពលោក។ នេះបើយោងតាមប្រភពពីសារព័ត៌មានស៊ីនហួរ។
សេតវិមានបាននិយាយនៅក្នុងសេចក្តីថ្លែងការណ៍មួយថា“ថ្ងៃនេះ លោកប្រធានាធិបតីលោក Donald Trump បានចាត់វិធានការយ៉ាងម៉ឺងម៉ាត់ដើម្បីការពារប្រទេសរបស់យើង។ អ្នកទាំងឡាយណា ដែកធ្លាប់ស្នាក់នៅប្រេស៊ីល នៅក្នុងរយៈពេល ១៤ថ្ងៃចុងក្រោយនេះ នឹងមិនអាចចូលមកក្នុងសហរដ្ឋអាមេរិកបានទេ។
សេចក្តីថ្លែងការណ៍បាននិយាយថាសកម្មភាពនេះនឹងអាចទប់ស្កាត់ជនបរទេសដែលបានស្ថិតនៅក្នុងប្រទេសប្រេស៊ីល មិនឲ្យឆ្លងបន្ថែមទៀតនៅក្នុងប្រទេសរបស់យើងដោយកត់សម្គាល់ថាវិធានការណ៍នេះនឹងមិនអនុវត្តចំពោះលំហូរពាណិជ្ជកម្មរវាងប្រទេសទាំងពីរឡើយ ខណៈការអនុវត្តន៍នេះនឹងចាប់ផ្តើម ពីថ្ងៃទី២៨ ខែឧសភា ឆ្នាំ២០២០ ខាងមុខនេះតទៅ។
សូមជម្រាបថា គិតត្រឹមរសៀលថ្ងៃអាទិត្យប្រទេសប្រេស៊ីលមានករណីឆ្លង COVID-19 សរុប ៣៦៣,៦១៨ករណី ក្នុងនោះស្លាប់ ២២,៧១៦នាក់ និងជាសះស្បើយ ១៤៩,៩១១នាក់ ខណៈសហរដ្ឋអាមេរិកវិញ មានអ្នកឆ្លងរហូតដល់ ១.៦៨លាននាក់ឯណោះ៕