ភ្នំពេញ ៖ ករណីឃាតកម្មដ៏សាហាវមួយបានកើតឡើងនៅយប់ថ្ងែទី២៥ខែឧសភា ឆ្នាំ២០២០ នេះ បណ្តាលឲ្យស្ត្រីលក់ចាប់ហួយម្នាក់ស្លាប់នៅក្នុងបន្ទប់ផ្ទះជួលមួយកន្លែងក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
តាមសមត្ថកិច្ចបញ្ជាក់ថា ជនរងគ្រោះឈ្មោះ អ៊ុច យ៉េន ភេទស្រីអាយុ៤៦ឆ្នាំ មុខរបរលក់ចាប់ហួយ មានស្រុកកំណើត ភូមិថ្មី ឃុំកំពែង ស្រុកព្រៃកប្បាស ខេត្តតាកែវ បច្ចុប្បន្នស្នាក់នៅ កន្លែងកើតហេតុខាងលើ។
ប្រភពពីឈ្មោះ អ៊ុច សារ៉ន ភេទស្រី អាយុ៣៦ឆ្នាំ មុខរបរកម្មការិនីរោងចក្រ ដែលត្រូវជាប្អូនបង្កើតរបស់ជនរងគ្រោះ បានឲ្យដឹងថា នៅមុនពេល កើតហេតុកាលពីវេលាម៉ោង១២ថ្ងៃត្រង់ រូបគាត់បានចេញពីបន្ទប់ទៅធ្វើការដូចរាល់ដង ដោយជនរងគ្រោះនៅក្នុងបន្ទប់ជួលតែម្នាក់ឯង ។
ស្ត្រីដដែលបានបន្តថា លុះដល់ម៉ោង១៨ និង០០នាទី រូបគាត់បានចេញពីធ្វើការ ពេលមកដល់បន្ទប់វិញ ក៏ឃើញបន្ទប់ចាក់សោរពីខាងក្រៅ នៅពេលនោះគាត់ក៏មិនបានចាប់អារម្មណ៍ អ្វីដែរដោយគិតស្មានថា ជនរងគ្រោះបានចេញទៅទិញឥវ៉ាន់។ ប៉ុន្តែនៅពេលគាត់មើលឃើញធុងទឹកកកនៅមុខបន្ទប់អត់ចាក់សោររូបគាត់ ក៏មានការសង្ស័យ គាត់ក៏បានហៅប្អូនជីដូន១ របស់គាត់ មកវាយបំបែកសោរបន្ទប់ ក៏ស្រាប់តែឃើញជនរងគ្រោះដេកស្លាប់បាត់ទៅហើយ។
សមត្ថកិច្ចបានឲ្យដឹងថា ស្ត្រីរងគ្រោះអាចស្លាប់ដោយករណីឃាតកម្មវាយប្លន់យកម៉ូតូ ខណដែលម៉ូតូរបស់ស្ត្រីរងគ្រោះបានបាត់មួយគ្រឿងផងដែរ។
ក្រោយកើតហេតុសមត្ថកិច្ចមកធ្វើកោសល្យវិច្ឆ័យ និងបើការស៊ើបអង្កេត ដើម្បីចាប់ជនសង្ស័យមកផ្ដន្ទាទោសទៅតាមផ្លូវច្បាប់។ ចំណែកសពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារ យកទៅធ្វើបុណ្យនៅស្រុកកំណើត៕
